兩個小寶貝既媽咪: 8月 2008

超級黑仔月-媽媽篇(28/8)

點解又有我份?!
因為我比佢哋搞到周身瘀傷囉.......
朝早,兩個爭嘢玩,爭到上張梳妝枱上,點知比佢哋爭爭吓又推推吓之下,成把小型風扇跌正落我個頭度,即時反應係彈起身,同佢哋開齋,個額頭冇流血但瘀咗......好痛~~~
之後到七點幾,穎怡瞓咗,咁我又整緊其他嘢,唔為意隻破壞王搞乜,到我知時,佢已經企咗上張櫈櫃度,將一小盒嘅針跌哂落地,又怕佢哋會拮到,咪周圍揾囉,移起咗個櫈櫃揾,揾完打算放返低,咁啱又比架BB車個車轆頂住,放唔到,我咪移前小小整架車,意外就係咁發生喇,當個轆移開時,我隻腳仲喺櫈櫃下,一跌落嚟......就咁夾住咗隻右腳,即時反應係咁抆,見到隻腳甩皮同瘀咗,嗰一刻係痛到行唔到,痛到我真係喊,嚇到隻破壞王唔敢出聲!!!過咗陣,終於行到,不過要"拐拐吓"咁行,又唔著得鞋,足足痛咗兩日.......第三日,唔掂佢唔痛喇,但瘀咗一大撻,總之冇傷骨已經好喇!!!!

超級黑仔月-穎怡篇(28/8)

可能皓賢之前啲菌,過咗去穎怡度,但一直處於潛伏期階段,終於係時侯發出嚟,接佢放學時,老師話佢個頭仔有啲慶,同個人仔好似好累,咁一路行一路話累,點知越行個頭同身就越慶,返到屋企,即時探體溫,燒到39度,見到咁就食退燒藥,本應比佢瞓一陣先算,但我決定同佢沖個涼,降降溫先~~~
沖完涼,吹乾啲頭髮仔,再探一探熱,真係低咗啲(38.6),就比佢瞓一陣,打算食飯至叫佢,但佢呢覺竟然瞓到半夜三點幾至醒,不過好彩都退哂燒~~~

[資料圖片] (因為冇心機影相,頂住先啦~~哈~~哈~~)

第二日,驚住佢太辛苦太累,所以又冇返學呀~~~

掛死我喇(27/8)

由於啱啱出院,太多嘢善後,公公叫我第二日至湊穎怡,雖然掛住,但都冇辨法!!!
到朝早,公公又打電話講話湊埋穎怡返學,我去湊放學,咁公公湊完佢返學,之後過嚟我屋企比返穎怡啲嘢我,跟住又要趕返屋企,呢幾日真係辛苦哂你呀公公~~~
到咗四點,即刻推住細佬去湊穎怡放學,一見到佢嚟個擁抱先~~~~終於一家團聚喇!!!

穎怡做乜,皓賢又跟住做呀~~~

雖然呢幾日冇媽咪喺身邊,但慶幸公公婆婆等.....每一個人都錫佢,呢件事之後,令我覺得好感動~~~~~
多謝哂!!!!!!!!

超級黑仔月-皓賢入院篇之三(26/8)

皓賢瞓醒又退哂燒,十一點幾醫生話等啲燒退定先可以出院,之後護士話同我哋轉大房,點知仲大件事,由於大房唔駛關房門,所以呢隻衰豬成日走出去,又要睇"米鼠鼠"啲生字卡,又要睇"史比比",仲辛苦過喺隔離病房,好難得至瞓著覺,可以鬆一鬆喇~~~

成日要落地,追到我氣咳呀.....

經過四日三夜嘅我...........殘爆!!!!

到佢瞓醒又玩過,周圍搞周圍走,正當我煩緊夜晚點算時,好消息~~~五點護士話出得院,即刻9秒9"的"佢上床,係咁執係咁執,一個大袋,一大包尿片,一袋奶粉,一袋污糟衫再加一袋零食,而皓賢幫我揹住袋積木!!!

準備起行喇~~~

Bye Bye 喇~~~會無期!!!

但爸爸唔得閒過嚟,我又想快啲"速逃",唯有揹住咁多嘢,拖住皓賢去會計部找數,再去藥房拎藥.....去到藥房又搞搞震,終於攞到藥,即刻搭的士返屋企!!!!
返到即沖涼洗頭再洗衫,搞完一輪,瞓得好舒服呀 ^o^ ~~~~

超級黑仔月-皓賢入院篇之二(25/8)

第二日,太多嘢搞(要成日換片片,又要留嗅嗅化驗.....)唔記得影相.....
要做嘅都係探熱,食藥&聞氣~~~仲要捉人仔呀,因為皓賢周房走冇時停,搞到我捉雞仔咁捉,頭都大哂!!醫生話佢支氣管炎,痾就因為係啲抗生素問題,聽完個人都定返啲.....但到沖涼時,已經冇再喊喇(適應力真強)
到咗夜晚,皓賢瞓咗,決定返屋企沖涼,執啲衫,玩具等物品,用咗個半鐘完成,又再過咗晚冇覺好瞓嘅一晚.....

第三日嘅朝早,著咗moon姨姨送嘅生日禮物,又玩積木(就係返屋企特登執嘅)

但公公打電話嚟,話我執比穎怡嘅返學物件中,竟然執漏咗最重要嘅..........鞋(超級失敗!!!)
好彩十點幾大姨媽過咗嚟,幫我睇一睇住佢(感激~~~),上到巴士,又發現唔記得帶鎖匙(仲失敗!!!),又好彩老爺喺屋企附近,可以借鎖匙,即刻放佢哋啲衫落機洗先~~~返到醫院,姨媽話細佬十問九唔應,樣樣都擰頭,又唔飲水,又唔食嘢,又唔瞓覺,又唔出聲,係咁坐喺床仔揭書~~姨媽話醫生巡房時講,如果唔燒就可以出院(聽完不知幾開心呀!!!)
到十二點幾,爺爺接班,我又即趕返去,比鞋仔穎怡返學,再到學校同校長&老師交待下,就返咗屋企褶我哋衫,同乾佢哋啲衫,再沖多個涼,又再返醫院~~
今次返到去,終於瞓咗覺,但都係乜都唔要,一個鐘唔夠就醒咗喇,而我喺度就乜都肯做,我知佢係唔開心我走咗,所以就玩"自閉"鬥氣,個個都冇佢辨法~~~~
到咗夜晚又燒返(39.9),真係嚇死我呀,等我成晚擔心.....唉~~~~

超級黑仔月-皓賢入院篇之一(23/8)

早幾日,皓賢有鼻水睇左第一次醫生,到19號半夜開始發燒(燒吓退吓咁),21號再睇第二次醫生,今次開埋抗生素,等佢可以快啲好......
到咗21號夜晚,同穎怡成屋周圍走後,發覺佢抖氣好大聲,係咁"her her"聲,已經擔心緊,到咗半夜,開始痾"水臭臭",瞓醒又痾咗四次(仲有燒),食奶又嘔奶,抖氣都仲有聲,嗱嗱臨執好行裝,送穎怡過公公度,再帶皓賢去睇急症.....
＋二點幾到急症室,好彩冇乜人去睇急症,所以好快有得睇,見完醫生,又話要照X-Ray,照完後,本來話要等1個鐘至有報告,但發現有狀況,大約＋幾分鐘就叫名,醫生話佢個肺仔有啲花,可能係肺炎或支氣管炎(令我驚一驚),要入院呀~~~~喺等人帶上病房期間,皓賢繼續冇時停,走來走去,完全唔似有事嗰隻!!!
上到兒童病房,見完護士,分咗去隔離病房(因為痾"水屎",怕會傳染)!!入到房後,初時唔敢上床(扮樹熊),之後窗外啲景象吸引到佢,終於肯喺床仔坐喇~~

手腳都戴住咗,唔驚走犯啦~~~~

仲可以咁古靈精怪,話有病都冇人信呀~~

記住我個精神樣喇(四日三夜後被摧殘到變大細眼呀)

幾經辛苦,終於瞓著咗.....

每每有護士&醫生同佢聽心跳同肺,好唔合作(喊),令我覺得好唔好意思呀~~~
第一晚等埋爸爸至沖涼,由於去到陌生地方,我一除褲仔,皓賢即刻"休"返上去,仲木無表情谷到塊面仔紅哂,經驗話我知,佢就嚟喊,所以叫爸爸唔好理佢住,果然.....不消10秒~~~~大喊,一邊喊一邊沖,我就一邊笑,沖完即收聲~~~~勁(快喊快收)!!!!
我留喺醫院,同佢依時探熱,食藥同聞氣,足足陪足4日呀!!!

特別鳴謝公公婆婆,幫我睇住穎怡咁多日,尤其係公公,要你頻頻撲撲湊穎怡返學放學,真係好感動~~~
仲有好多關心我哋嘅親朋好友,我會記得你哋對我嘅好~~~
Thanks a Lot!!!!

收樓喇(11/8)

因為6號颱風關係,延遲至11號至收樓,幾個月後,我哋將會搬入沙田喇.....
我哋約咗2:30pm辨手續,但左等右等,要成三個幾鐘至搞掂哂,最後要6:00pm至返到去湊佢哋放學咋!!

求其影咗啲相.....

開學喇-穎怡篇(7/8)

8月7日,穎怡一早起身,因為到佢開學喇,正式成為K2學生,喺學校入面做姐姐喇!!佢就好開心咁返學,仲懶叻話自己冇喊喎-_-"(如果你仲喊,真係好醜囉)
由於姨媽唔知佢哋要返學,想撩人去街(當然最後冇份去),上左嚟屋企,做埋司機送我哋返學添^o^~~~thanks!!

喺屋企換好校服,又擺哂post......