兩個小寶貝既媽咪
我有兩個小可愛,一個叫穎怡(5/11/2004),一個叫皓賢(12/6/2006),呢個係我首個Blog.,希望日後有大家同我陪伴住我既小朋友成長,一齊分享佢地既生活點滴~~~~
2008年3月26日星期三
2008年3月24日星期一
2008年3月19日星期三
巧遇明星篇(18/3)
老公今朝冇嘢做,11點幾返左嚟屋企,兩隻衰豬見到爸爸開心到飛起,係咁痴住爸爸,氹到爸爸暈哂大浪,當我透明咁,搞到有啲吃醋......
一隻樹熊皓賢,一隻樹熊穎怡.....攬到幾實
之後出去食嘢醫肚,去左穎怡返學前成日食飯嘅茶餐廳(都幾遠下),食飽飽後,餐廳嘅叔叔&姐姐話梁榮忠喺我隔籬食飯(隔左條柱),聽完即刻揾相機(好彩有帶^_^),膽粗粗借穎怡過橋問佢可唔可以影張相,佢好好人答應左,影完仲問穎怡幾多歲添......
影到我好肥呀(三下巴現形記)~~~~&皓賢冇份影.....
飯又食飽,相又影完,跟住同大腳板穎怡買返對鞋仔先......因為佢啲鞋已經唔啱著喇,得返一對波鞋又難襯裙仔,於是買返隻斯文鞋~~入到舖頭,揀左幾款布鞋比佢自己揀,但冇佢size.....結果揀左一對粉紅皮鞋.....本身想揀布鞋仔襟著啲,驚皮鞋易整花(其實一早睇中),點知......都係整定係呢隻!!!
穎怡自己揀呢新鞋呀......
今次皓賢乜都冇份添......
2008年3月13日星期四
驚嚇的一天(12/3)
話說2月24日,我將皓賢嘅BB床換左三姨媽比嘅BB床,點知......唔夠一個月皓賢已整爛左,今次嚴重到係床板都就跌,係個床架甩左出嚟,隻衰豬係咁"啊"我,見到之後嚇左一大跳,我諗佢都嚇親呀!
終於,喺我抓爆頭之際至諗到個方法咋!!!!
幾經辛苦至揾到條尼龍繩綁實張床仔......皓賢隻脚仔做左攝石腳添......
箭咀嘅位置就係喇!! 咦~今次隻脚仲攝多左喎......
另外,皓賢流鼻血......朝早穎怡叫醒我睇下細佬,初時以為佢食緊蕃茄醫,但諗諗下無理由,再望真啲,原來佢拎住個染血嘅奶咀,而口邊就係奶咀印嘅血乾,驚嚇指數係甚高......見到佢咁樣即彈起身,衫,褲,毛巾,被,全部都有血漬,在我止唔到血同時,當然打電話求救啦~~大姨媽..........
教完個方法之後,真係冇事喇~~~THANKS大姨媽!!!!!!!